الاثنين، 7 ديسمبر 2015

وعاء التعبير ٤


الحب عندي .. كوضع الرقبة على سن المقصلة
يقينا.. سيسقطني السلاح بأي لحظة
فكيف لي ان اغني ..
في حضرة الموت المضطرب

*****

كلما اقتربت .. ايقنت استحالة الحياة بسلام مع من اقترب
استحالة المعية الدائمة على الاطلاق
*****

الكلام لمدام/ف. من سكان منطقة المطار في اسكندرية، عملتوا ايه؟
بعد ما غرق البيت جالنا قرار اخلا من الحي في خلال ٤٨ ساعة
ازاي ، حتروحوا فين ؟
مساكن عبد القادر ، والدنيا مقلوبة عندنا المنطقة الشمالية كلها ، بس انا مش حسكن فيها؟
ليه بس روحي وشوفي
كلها بتوع حشيش ومخدرات ، حعيش ازاي فيها انا وبتي العروسة واحنا معناش راجل؟

بصتلها ، وطيت راسي ومعرفتش ارد
يا ف. براجل او بدون ، الاهانة وانعدام القيمة هي ملخص الحياة هنا.
*****
Feeling love has no logical reason,  if it's planned it's a relationship or a companionship..  Love has that "just like that" effect even if it takes time to grow mature and deep.

*****
متوقعين ايه من شوية اموات بتتعارك على تربة وبتشد بعضها للدفنة تحت ،  الموت الجماعي ونس بردو.
#مصرـمقبرةـكبيرة
*****
الآن وفي ظل سنوات من السنجلة الجميلة ، احب اؤكد إن فيه ناس طينتهم كده صعب يشاركوا حياتهم مع آخر ولازم مقاربات و توحد كبير جدا عشان تظهر احتمالية وكمان الراحة اكثر بكتير في العزوبية والعزلة والشعور انك مستور جوا عقلك عن تعريات الأغراب ليك-صفة الاغراب مش بتتغير بالقرب الجغرافي ولا رزالة وتواتر المواعيد- وأغراب لأن اللي زيك ماينفعش يعري مخه لحد ، محدش حيقدر ولا حيفهم .
لذا أنا مستمتعة جدا بحريتي وشايفة اني بالأغلب حكمل كده يمكن دايما ،  مش عارفة و لكني كده حتى اشعار آخر  وربما تجربة مغايرة.
*****
ازاي اكتب رواية في بلد فاقدة كل تواصل واحساس بالجمال او السحرية او حتى ابسط انتماء فيها ، ازاي اقدر اخلع دروعي واكتب واغوص في كلامي وظهري مكشوف وانا بنام خايفة وكارهة ومخنوقة
*****
واكتشفت ان الغربة والاغتراب والاحساس بالنبذ والوحدة ، محركات ممتازة ليا عشان اخطي خطوات ضخمة و اكتشف ان حبي لاستمرار بقائي مع او وسط مجموعة بتخليني اتخلى عن المختلف فيا عشان مايمشوش ( انا كويسة اهه ماتسيبونيش) .. واولهم التفوق 
وساعتها كان الاجتهاد والتقدم تعويض عن انعدام الصحبة مش العكس .. عشان كده الحب والارتباط والانتماء ترامادول قاتل لازم ابعد عنهم بالمشوار لو عايزة اكون
وافتكر ان اول صداقة ليا باظت لاني طلعت الاولى وهي التانية وساعتها ايرت مني رغم انها كان بقالها سنين بتطلع الاولى تزوير من المديرة لاني ماكنتش عصفورة
وافتكر اني عرفت ان الرابح يبقى وحيدا من بدري مانكرش ان احيانا انا نفسي ايرت من قوتي عشان سبب لبعد الناس عني
- لانهم عنصريين ولاد وسخة ويتشنجوا اما يلاقوا حد مختلف ومتخطيهم بمراحل -
بس خلاص #ذكريات_مصر_دراسية
*****

إحدى أحلامي اني افتح كشك أو عربية سندويتشات سريعة : فطار وغذاء وعشاء ، من أمتع الحاجات بالنسبة لي عمل السندويتش وتقديمه بإحتفاء للي بيركن عندي يطبطب على نفسه بأكلة سريعة وكوباية شاي.
*****

فيه ناس قريبة أوي أوي برغم المسافة ، اقرب من طلقة رصاص او طلة شباك واقرب كائنات الكتب ليا نبيي نيتشه.
#هلوسة_الخميس
*****
تبادرني سمرا، طنط هي الساعة كام؟
٧ ياسمرا ما هي قدامك عالحيطة
اصلي مش بعرف فيها ، وكل ما اسأل عم/... يضحك عليا
 اصل انا باجي هنا الصبح واقعد لغاية ٨ونص اروح وعمو بيدي لماما ٣٠جنيه
ومابتروحيش مدرسة ياسمرا
مدرسة ، لأ ، بس اخواتي بيروحوا.

مشهد تعجيز تاني ، وسمرا اللي سنها مايزيدش عن ١٢ سنة بتبصلي ببراءة وبتضحك عشان ببتسملها.

Author:

I am a whole universe 

0 comments: