الثلاثاء، 22 ديسمبر، 2015

سلالم الجبل لتحت



كل مايتقِّلك الحنين
زود أتقال البار وارفع
كإنك بتنزعه من جواك
وهو.. مكلبش فيك
زي طفل ، ويمكن طفيل
بيمص من روحك أي شبهة فرحه
ومابيسيباكش غير مهمَل ملخوم في مرارتك

بيوجعك فقده ، وبيلح في جوفك الوجع
وصلت ل٨٠ عدة بطن
دوس أكتر ، عشان تحاصر المه فيك
واهمل نفسَك المرعوش اللي بيترج فيك
يمكن يهرب في يوم ، ويريَحك من الاحتمال.

طلع قلم وشخبط دواخلك على ورقة من غير سطور
لزوم الضياع
عري بؤسك وأطّره في تجميعة الوان أو سلطة حروف مبتورة
مابتنمتيش لأي شيء
امضغ صفحتين من كتابك وتوه نفسك في الغابة النرويجية*
ماترجعش و ماتقدمش.

بتلعب حبة كاراتيه على كونغوفو
نط واضرب بس في الهوا..
من بعيد
عينك مابتحملش الناس ولاقادر تلمس أي قرب

إجري..واشتغل..واجري وارجع اشتغل تاني وتالت
دخن وشيش واضرب واشرب
غرّق نفسك بالمطر والايس كريم والطين الشارد
ادخل بالذات في قلب البركة المنبوذة 
في قلب الطريق
لف..
وبص للعالم نظرة وحيدة "انت مش هنا"
وكمل طواف في حضرِتك
مفيش ليك غيرك.. اله ومريد
عدمك ،
مادتك الخام للخلق
انت صنم آه
لكنك تمثال حقيقي
مش إدعاء
ونبوة خراب
انت مش حياة لكنك بتحيي
زي أجعص اله
دينه التجاوز
ومصبه شبكة البالوعات أو الوحدة فوق أوليمب منسي.

هبه يونس النيل

* رواية الغابة النرويجية - هاروكي موراكامي

Author:

I am a whole universe 

0 comments: