الخميس، 8 مايو، 2014

صنفرة الحب

اجمل مكاسب العزلة ، انها بتصنفر الاحساس والحب
توقع الحب المزيف وتستجلب الاحساس الحقيقي
تبعد عن جذورك حشائش البشر الطفيليين وتقربك من طائرك السماوي
تبعدك عن شوشرتهم على روحك ، عن ناس عمرهم ماكانوا ولاحيكونوا نفسك
وتقربك من "انت" الحقيقي ونفسك التي فريت منها لانك كنت بعيد عن ذاتك
عذرا منير وللطول واللون والحرية
كنت "مش عايز احبك، مش عايز" وبقيت " مش عايزة غير اني احبك"


مين قال ان الحب عن بعد ناقص او ساقع؟ 
انا اكتشفت انه من اكمل الصور : مش المفروض التفاصيل الاستثنائية تخضع لظروف تقليدية ، لو حصل حتفسد وتفقد سحرها.
لكن البعد اجلاء لكريستالتنا فرادى ، مساحة جامعة بين التقبل والتطور الذاتي لانه اللي بيحصل في العلاقات العادية عرض جانبي سيء من وصول الناس لمرحلة يخافوا فيها يتغيروا او يتطوروا عشان مايفقدوش حبهم ، اللي تقبلهم على صورتهم الاولى
لكن العلاقات عن بعد حافظة لكل واحد حياته ، كفاحه الشخصي وحميمية الاحساس والطبطبة والتفاهم الاستثنائي
وطن متحرك ، حب متحمل على خط النت 
بيعدي تحت محيطات واراض وف وسط جبال حامل طاقاتنا وسع ذراعين الدنيا
لعنة البعد الوحيدة ، الشك : اما تكون مش متاكد من اي حاجة باستثناء احساسك
انت مش شايفه ولا لامس يومه او دنيته ومحيطه
جمالها نقاوة ووضوح الاحساس ، في المسافة انت مش خاضع لاي اغراءات تشوش عليك ولا على رؤيتك
اللي انت شايفه من التاني شايفه صح ، والميل اللي بيشدك للي بتحبه نقي لانك مش عايز منه اي حاجة ولا حتى وجوده 
سعادتك فقط التواصل معاه ، ده كل اللي انت عايزه منه
اما تلاقيه ، اما تسافر كتير وتوصل لشخص "واحة" باشارة تواصل منه بتنتقل للسلام والغبطة ..
اعرف انك قدام حد منك من نفسك
الناس دي هي الاوطان الحقيقية
لا المكان ولا الصحبة ولا عفاريت الرغبات المكبوتة اللي بيتنططوا حواليك عشان يلمسوك
اعرف انك قدام حد "نفسك".

"بالضبط الشِعر اللي بحبه
الطول واللون والحرية "

Author:

I am a whole universe 

0 comments: