الثلاثاء، 4 فبراير، 2014

خطابات غير مرسلة 7 - خطاب لأسمنتي الخائن المغشوش


ان يكن ظهرك للعراء في وجوده ذلك هو جوهر الشعور بالخيانة

اما تعمل الحيطة اسمنت عشان تدعمها بطبقة اقوى تحميها من العالم الخارجي ، طبقة تبقى = انت
وبعدين تكتشف ان الاسمنت ده مغشوش
وبياكل الحيطة من جوا
وانت اخدت مقلب فيه ومقلب عشان شيلته من مكانه ونقلته على ظهرك
مسافة سنة ونص وقدّرته وحطيته في بيتك
ساعتها
بيكون الازميل الجريء اللي بيكشف عن الحيطة ثقلها الهدام
انقاذ جميل لكنه جارح ..
جارح و مخلص

ساعتها ماينفعش عشان تنكر انه انضحك عليك انك
تلزق الاسمنت ده اي كلام على الحيطة
بغراء اول ماحيصادف الشمس حيتكسف
او حتى تقبله مؤقت
او مركون على رصيف حياتك
وجوده كل دقيقة زيادة بياكل جلدك وجواك ويفضيك منك

ماعدش ينفع تعديها وتضحك على نفسك بالامل والتغير والانتصارات الخيالية
او بكرة وحيحصل والصور الافتراضية اللي مالهاش علاقة بالواقع حواليك
ماعدش ينفع تسقط احلامك الوردية على واقع معدني صديء

ماينفعش غير انك تحترم ثقتك اللي اتصلبت قدامك
وعلى الاقل خالص
تنفي الاسمنت الخاين ده من عمرك
لانه مايستاهلش حتى وجوده في محيطك

Hapy


Author:

I am a whole universe 

0 comments: