الأحد، 7 أبريل، 2013

ملح .. مفضض .. هامشي / خطاب غير مرسل للعالم


عمر ماخطر ببالي التصور ده من قبل
بس هو ده التفسير الوحيد لانعكاسات العالم الغريبة
باول مرة عرفت ده
كان وانا راجعة بالترام الجديد
جنب الشباك
واكتشفت ان ازاز الشباك اللي ببص عليه بيعكس
صور ويفط الجهة المقابلة
ولكن بشكل عكسي
 ةيلديص .. صيدلية
 ..ر روتكد .. دكتور ر..
وبعدين فكرت بكل اللي جوايا وبرايا
برايا العالم بالضبط زي صورة جوا مرايا
كل ماتقربلها تتشتت
وكل ماتبعد عنها تصغر وماتشوفهاش
الناس ، الامنيات ، الاهداف
اما جوايا .. فالتفاعل اكبر
كل ما ... ي..نعكس ده بالمقلوب على العالم
كل ما افرح يحزن العالم وكل ما احزن يطنش العالم او يضحك
وبالاكتر.. اتعودت اني لازم
كل مايحزن العالم افرح 
وكل مايفرح العالم احزن
يعني احاول اقلب المقلوب يمكن يتعدل
حاولت ابقى سيكوباتية
وسادية
واحيانا شريرة 
ففشلت
فحاولت ابقى عبيطة
ومازوخية 
واحيانا طيبة وبرده فشلت
ووصلت لمرحلة لا انابفرح ولا انا بحزن
جسم مفضض بتترمى عليه
كل انعكاسات المرايات الممكنة والغير ممكنة
زي مزبلة الصورة كده
بلحظة حسيت اني عالقة في برواز المرايا
لاليا حق الظهور ولا الوجود ولا الخروج من الوجود
يعني من كائنات الحواف 
موجودين بس كصدى
اعتقد
حل امثالنا الوحيد
هو كون مصغر
زي الكوكب العبيط اللي كان موجود جوه ساعة في شنطة 
في فيلم men in black
يمكن عشان الشرطيين دول عندهم نعمة العتمة
يمكن
بس صعب اوي 
انك تعيش زي حبات الملح
كده كده بتتكنس اما تقع وتتحط على طرف معلقة الاكل
بس للنكهة
ملح - مفضض-هامشي
مكانه ايه غير انه يتسيح في حلة العالم
ويدوب في القعر يمكن يتمزج بيها
ويبقاله.. جدر
يمكن ؟!

7/4/2013

Author:

I am a whole universe 

1 comments: