السبت، 9 يونيو 2012

خطابات غير مرسلة 5


  خطابات غير مرسلة - 1
  خطابات غير مرسلة - 2
  خطابات غير مرسلة - 3
  خطابات غير مرسلة - 4 : (( خاصة وتم ارسالها لصحابها))


عارف اما تكون نَفسك حتة سفنجة ضعيفة
اجبرها العالم على تشرب احداثه وحرقات سيجارته
اللي سابت تخمة فجوات في انحائها

ويجي حد يأكدلك انه حيصلب مطاوعة نفسك
ويقوى بيه ظهر
سفنجة روحك
ويحميك من بصق وعصر العالم فيك
حد يقولك مش حيسيب مية تهوب ليك وتزخزح الارض من تحت رجلك
او ريح تصفع اطرافك وترنح ثبات وقفتك
تصدقه
وتمنحه فجواتك يكون ليها صمغ كامل
فيتسلل الصمغ لتحت رجليك ويزحزح الارض
فتتطمني انك ساندة عليه
تقوى رياحه على اطرافِك وتطبقها ببعض ويطبقك كلك ببعضك
في جيبه
برده تتطمني ان ليكِ صمغ راسخ .. ملزوقة انتِ بيه
شروق وغروب الشمس بيتحركوا على دفتين صدره
وانتِ مكتفِية من الاكل والشرب والكلام بمضغ زفيره
مكتفِية بالضلمة لغاية الظهور اليوبيلي لشموس عينيه

تمري في ايده
فيفتح المراهقين افواههم عاجزين عن فهم اللي عكس فيزيا ثانوي
من طفوك الحر في مداره
ويمصمص العواجيز شفايفهم لان ضعف القلب يحرمهم
من حمل تقل حب كده
وتمري بين جيبه وبين ايده

ولانك متعلقة برقبته دايما
هدومِك جلده
وايديه الشال الناعم اللي محوطِك
في وسط دايرة السوق يوجدٌك .. مش مهم
 سوقِك انتِ هو براحه المنبسط في المسافة من رقبته لدقنه
حريتِك بتتسرسب من بين صوابعه
وخيوط شعرك بتتشابك محلها فيه
وفجأة من غير ماتدري ولاتتوقعي
تلاقي نفسِك  منه ومن صمغِك عريانة
هو نزع عنِك عبايته وذراعه وقبلهم حضنه
ونزع نفسه عنِك كلِك
وسابِك كده .. اسفنجة فجوات ظاهرة وبايخة ونحيلة
كل اللي يعدي يبص فيها يشوف ايده الممدودة تتلصص م الناحية التانية
يمصمص
ويتعجب ويستهزيء
وممكن يزقِك برجله او يطيرك لبعيد
او جايز يجري بيكِ العيال ويناوشوا الكلب الجربان
وبآخر الليل تتكومي على جنب على نفسِك
ويمصمص اللي بيمر على اللي باقي منك
يضحكوا .. ويقهقهوا
ايه ده كمان ؟؟ هو فيه هلاهيل كده.. هو انتِ موجودة ليه؟ بضعفك ده؟ عايشة لسة متجوزة بهدلة العالم لبواقيكي؟

9 يونيو 2012

Author:

I am a whole universe 

0 comments: