الجمعة، 27 مارس، 2009

خطابات غير مرسلة - 2


دلوقتي حبيت اقلك انك سايبني من كتير اوي
ومبقاش عندي شجاعة التفكير في انعدام وجودك ..
بتصرف و كإنك موجود ، لاني خايفة مني اما اصدق غيابك الكامل

بقالي فترة ،
عندي حالة بكا جوف
اصلي عاملة تحويدة صغيرة على دموعي
ومتفقة معاها على ممر جواني ..
من العين للمعدة .
أنا عارفة حتقول ايه !!
فعلا ،
بيتبلع الدمع و مابيتهضمش
لكن اعمل ايه ؟
تقريبا عندي عسر هضم دمعي
فبقت ملوحته ترد تاني للعين
عشان كده اضطريت استشير طبيب العيون
واستغرب جدا من اني بقالي فترة مانعة نفسي اشوف أي موجودات غيرك ..
يمكن بعمل كده عشان اجمد ادراك عقلي على صورتك ..
بس ، تعرف
انت دمل مش عارفة اداويه او اكويه و لا حتى قادرة اقطعه مني .
كنت فاكرة انك موجود في وجع ضهري
واما اتعالجت
لقيتك اعمق من كده بكتير
.....
دمل حدوثك بعمري
اعمق من قرحة المعدة
وتحكمه ، اكبر من ضعف الاعصاب

مازلت برص المخدتين ، واحدة تحت جنبي
كإني مخبياها في صدرك
والتانية على كتفي
كانها تقل ايدك بتضمني ليك .

12 - 2008

هابي

Author:

I am a whole universe 

1 comments: